ఇందులో నా చిన్న నాటి సంగతులు కొన్ని చెబుతానే..
అప్పుడు నాకు పదేళ్ళేమో..
ఓ సారి తిరుపతెళ్ళాం..
వేంకటేశ్వరస్వామిని అలివేల్లు మంగమ్మనూ దర్శించుకున్నాం..
అలివేలు మంగమ్మ అభయముద్రను చూసిన నాకు ఆమె తన చేతి నాలుగు వేళ్ళనూ కిందకీ పైకీ ఇలా ఇలా అని నన్ను రా..రమ్మని పిలిచినట్లనిపించింది..
అదే..అమ్మతో చెప్పాను అలివేలు మంగమ్మ నన్ను సైగ చేసి రారమ్మని పిలుస్తూంది అని
అందరూ ఒకటే నవ్వులు..
మా అవ్వ వుండేది గుడిపాటవ్వ..
వాళ్ళ వూరు గుడిపాడు..అందుకని ఆమెను గుడిపాటవ్వ అని పిలిచే వారట..
ఆమెకు పిల్లలు లేరు..
మా అమ్మకు నేను ఐదవ సంతానం మా అమ్మ నన్ను కనేసి మా అవ్వ చేతులలో పెట్టేసింది..ఎందుకంటే..అదే సమయానికి మా అక్కలూ కానుపుకు వచ్చేసారనమాట.అంటే మా అమ్మ కూడా మా అక్కలతో పాటూ కనింది నన్ను.భలే తమాషాగా వుంది కదూ..అవును మరి ఆ కాలంలో ఆపరేషనులూ పాడూ లేవు మరి.ఆడవారు బహిష్టులు పోయేవరకూ అలా కంటూనే వుండేవారు.మా అమ్మకు ఏడుగురు సంతానం. ఆ కాలంలో ఎలా పెంచేవారో పాపం కదూ.
అలా.. మా అక్కలు వచ్చే సమయానికి నాకు రెండునెలలుట.తెల్లగా ముద్దుగా..బొద్దుగా..మరి నేను పాపం వుండేదాన్నిట.అక్కలూ బావలకు సేవలు చేయడానికి అమ్మ రెడీగా వుండాలిగా..అందుకని మా అమ్మ నన్ను మా అవ్వ నన్ను మా అవ్వకు అప్పజెప్పింది..మా అవ్వ వాకిట్లో నులకమంచమేసుకొని దాని కాళ్ళకు చీర వుయ్యాల కట్టి అందులో నన్ను పడుకో పెట్టి పాటలు పాడుతూ ఊయలూపేదిట..మా అమ్మకు పాలిచ్చే తీరిక కూడా ఉండేది కాదుట..అమ్మా అమ్మా ..పిల్లకు పాలియ్యమ్మా
..ఏడుస్తూంది..అని మా అవ్వ అంటే అమ్మో ..అక్కలో ఎవరొ ఒకరు నాకు పాలిచ్చే వారుట.అలా నేను ముగ్గురి పాలు తాగి పెరిగాను ..అన్నట్లు మా అక్కలకు ఇద్దరికీ మగపిల్లలు పుట్టారు.వారికీ నాకూ రెండు నెలలే తేడా..
బాగుందా..నా జన్మ వృత్తాంతం..
మరీ ఇంకో విషయం మాట్లాడుకుందాం..బై..
***
ఇంకో ముచ్చట..
పానీ పూరి తిందామని వెళ్ళాను..
అతను నాకు మంచి ఫ్రెండు..ఇద్దరు కొడుకులు ఓ కూతురూనట.అతను ఆరు లక్షలకు ఈ హైదరాబదు సిటీలో ఇల్లు కొన్నాడు.నాలుగెకరాలపొలం ఊరిలో కొన్నాడు.ఎలా అంటారా..?అతను పొద్దున్నే ఉల్లిపాయలు బండిలో వేసుకొని నాలుగు వీధులూ తిరిగి అమ్ముతాడట.దానిమీదో అయిదువందలు రోజుకు ఆదాయమట.సాయంత్రం పానీ పూరీ బండి.ఇంకో చెరుకు బండి అతని భార్య నడిపిస్తుంది.దానిమీదో ముఫైవేలు సీజన్ లో మిగులు.ఇంకో బండిపై మిరపకాయ బజ్జీలు పెడదామని ఆలోచిస్తున్నాడట.మొత్తానికి ఖర్చులుపోను నెలకు అతని సేవింగ్స్ పదిహేనువేలు..
చూసారా..
శ్రమైక జీవన సౌందర్యం..
అతని కూతురు ఇంటరు 75%తో పాసైంది..
కొడుకులిద్దరూ బానే చదువుతున్నారు..
మన మధ్య తరగతి భేషజాలకి కాలర్ నలగని జాబులలో చాలీచాలనిజీతాలతో..జీవన పోరాటం
నాకు పుష్పక విమానంలో కమల్ హసన్ గుర్తొచ్చాడు సుమండీ..
అందులో చాయ్ లో నాణేలు వేసుకొని కమల్ చాయ్ తాగుతాడు..
రోడ్డుమీది ముష్టివాని పట్ట కింద బోలెడు డబ్బులు..
భలే బాగ వుంది ఆ సినిమా..
కమల్ మధ్యలో అడ్డదారిలో ధనవంతుని బంధించి హోటల్ పుష్పక్ లో సుఖాలు అనుభవించినా ..చివరికి అతని సంసారం చక్కదిద్ది..తనూ మంచి ప్రేమ అనుభవాన్ని పొందుతాడు..
చివరికి ఆ హోటల్ యజమాని ఆ స్థాయికి ఎలా ఎదిగాడని అంచెలంచెలుగా ఉన్న ఫోటోలు తెలుపుతాయి
కానీ మనం అలా ఉల్లిపాయలు అమ్మలేమనుకొండీ..
కానీ తల్లిదండ్రులు కష్ట పడి చదివిస్తున్నందుకు పిల్లలైనా బాగా చదివితే సంతోషం..కదూ..
మా పిల్లలు కుక్కని పెంచుకుందామని ఒకటే పోరు..
వద్దురా..మళ్ళీ దానికీ చేయలేక నేనే చావాలి అని నేనూ.ఓ సారి పా రెండవ వాడు తెల్లని బుజ్జి కుక్క పిల్లని తెచ్చాడు..
మనింట్లూ పెట్టుకుందాం అని నస..సరే ఈ ఒక్క రోజూ వుండనీ అని అన్నా..
కొంతసేపు ఆడి వాళ్ళు కిందకి ఆడుకోవటానికి వెళ్ళారు..
ఇక ఇది ఒకటే అరుపులు ..దాన్ని పట్టించుకోవట్లేదని..
పాలు పెడితే చక్కగా తాగింది..
మళ్ళీ అరుపులు..
ఇంట్లో పనిలో ఉన్న నేను ..బాల్కనీకి వచ్చి ఏయ్ ..అరవకు .. అంటే నన్ను చూసి బుజ్జి బుజ్జిగా..కుయ్ ..కుయ్..మంటూ..మూల దాక్కోవటం..నేను వెళ్ళగానే మళ్ళీ అరవటం..
అసలు మన ఫీలింగ్స్ అన్నీ యెంతబాగా అర్థం చేసుకుంటాయో..అవి..చంటిపిల్లల్లానే..
దగ్గరికి వెళ్తే తోకాడిస్తూ మనని రాసుకు తిరగటం..
అందుకే చాలా మంది పెంపుడు జంతువులని కన్న బిడ్డల్లా ప్రేమిస్తారు..అవి విశ్వాసంగా వుంటాయి మరి.
ఒక్క రోజు దాన్ని అలా వుంచేసుకున్న నాకే దాన్ని వదలబుధ్ధి కాలేదు కాని బలవంతంగా పిల్లలనుంచి దాన్ని వేరు చేయాల్సి వచ్చింది..
మా నాగ పద్మిని అక్కయ్య అప్పుడు రేడియోలో కొత్తగా ఉద్యోగంలో చేరింది..
మా మిద్దే పైన ఓ రామ చిలుక గాయపడి పడిఉండటం చూసాం..
వెంటనే మా ఆస్థాన వైద్యుడు గుర్రప్ప పిలిపించబడ్డాడు..
దానికి అతను తనకు తెలిసిన చికిత్స చేశాడు..
అది కొద్దిగా కోలుకుంటున్నట్లే కనిపించింది..పాపం..
హాలు మధ్యలో ఓ పంజరంలో దాన్ని వేలాడదీసాం..
మా ఇంట్లో ఎప్పుడూ..వచ్చే జనాలూ ..పోయే జనాలూ..
కవులూ పండితులూ..జ్యొతిష్యులూ..భక్తులూ..
అమ్మ రామాయణ పారాయణాలూ..రామ పట్టాభిషేకాలూ..
అయ్య సన్మానాలూ..పండితగోష్టులూ..
చిలకకు ఎప్పుడూ హడావుడే..
అందరూ దాన్ని పలకరించే వారే..
అదీ అమ్మకు రామ రామలూ..అయ్యకు కృష్ణ..కృష్ణలూ బాగానే మాట్లాడేది..నాగ ఆఫీసునుండి వచ్చీ రాగానే గేటు వేయడం తరువాయి ఇంట్లోకి ఒక్క పరుగున వచ్చేసేది..నేనూ అంతే గేటు వేసీ వేయడంతోనే..
పరుగెత్తుకుంటూ ఇంట్లోకి రావడం.
ఎందుకట్ల పరుగెత్తుకుంటూ వచ్చేది..మెల్లగా రాలేరా..అనేది మా అమ్మ.
వచ్చీ రావడంతోనే అమ్మా..అంటూ అమ్మ వడిలో ముద్దులు పడడం అంతా బాగుంటారు..నా దగ్గరకు వచ్చేసరికి ఇలా అనేది అమ్మ నవ్వుతూ..
ఓ సారి ఇంట్లో సున్నం కొడుతున్నాం. ఆ ఘాటుకి చిలకకి మళ్ళీ జబ్బు చేసింది..
మళ్ళీ గుర్రప్ప తన వైద్యం తాను చేసాడు..కానీ చిలక అసువులు బాసింది..
మా పవిత్రమైన ఇంట్లో కొద్ది రోజులు గడిపే భాగ్యం దానికి ఉంది పాపం మరి..
దాన్ని పట్టుకుని మా నాగ ఒకటే ఏడుపు..
ఏంటో నా హృదయం బరువెక్కింది..
ఉంటా..
